Óskar Hrafn Þorvaldsson, þjálfari karlaliðs Breiðabliks, var í gær spurður út í ummæli Tómasar Þórs Þórðarsonar í útvarpsþættinum Fótbolta.net á X-inu á laugardag. Þar skaut fjölmiðlamaðurinn á Óskar.

Eftir leik Blika gegn Val í síðustu umferð Bestu deildarinnar bað Óskar íþróttafréttamenn að fara ekki fram úr sér í umræðunni um sóknarmanninn Stefán Inga Sigurðarson.

Stefán hafði farið vel af stað í deildinni og skorað í fyrstu tveimur umferðunum eftir að hafa komið inn á sem varamaður.

Í útvarpsþættinum bað Tómas Óskar afsökunar á að hafa talað Stefán upp, þó með miklum kaldhæðnistón. Í kaldhæðnislegri ræðu sinni baðst Tómas einnig afsökunar á að hafa sett pressu á aðra unga og efnilega leikmenn í fortíðinni.

Eftir tapið gegn ÍBV í gær var Óskar spurður út í ræðu Tómasar í viðtali við Fótbolta.net.

„Mér fannst hún yfirdrifin, skrítin og helst honum til vansa. Ég skil ekki hvert hann er að fara með þetta. Eina það sem mér gekk til var að við erum með leikmann sem er vissulega 22 ára, en hann er að stíga sín fyrstu skref í efstu deild. Hann er búinn að vera þrjú og hálft ár í bandarískum háskóla og missa af stórum hluta tímabilsins hjá okkur. Hann hefur aldrei klárað tímabil og aldrei byrjað tímabil,“ sagði Óskar.

„Eina sem ég var að biðja um var að menn myndu draga djúpt andann. Stefán er feikilega efnilegur leikmaður og ef Tómas vill halda þessu áfram þá heldur hann þessu bara áfram. Það er ekkert sem ég get gert í, en eina sem ég bað um var að menn myndu slaka á svo er það þeirra að ákveða hvað þeir gera. Ég ætla ekki að segja þeim hvað þeir gera, en hins vegar finnst mér skrítið að Tómas skuli í raun vera leggja lykkju á leið sína til þess að halda eldræðu um þetta mál og mér fannst það honum ekki vera til sóma.“