Knattspyrnusamband Ísland hefur birt ársreikning sinn fyrir árið 2022 sem og fjárhagsáætlun fyrir árið 2023. Kemur þar fram að rekstrartekjur sambandsins hafi numið um 2 milljörðum króna á síðasta ári og var hagnaður sambandsins um 157 milljónir króna. Fjárhagsáætlun sambandsins gerir ráð fyrir samdrætti í tekjum milli ára.
Hagnaður sambandsins á síðasta ári nam 156,8 milljónum króna og skýrist hann að mestu af mótvægisstyrk frá stjórnvöldum vegna heimsfaraldurs og uppgjöri sjónvarpsréttinda.
Mótahald sambandsins kostaði sambandið rúmar 245 milljónir króna, dómarakostnaður nemur þar 80% af kostnaði.
Í samantekt KSÍ í tengslum við ársreikninginn er bent á þá staðreynd að sambandið hækkaði greiðslur sínar til aðildarfélaga um 30% milli ára og að sama skapi voru sjónvarpsgreiðslur til karla og kvennaliða, er varða bikarkeppni sambandsins, jafnaðar.
Rekstrartekjur KSÍ á árinu 2022 námu 2.047 milljónum króna og voru 15% hærri en fjárhagsáætlun fyrir árið 2022 gerði ráð fyrir.
Frá ríkinu fékk KSÍ úthlutað rúmum 110 milljónum króna í mótvægisstyrk vegna heimsfaraldurs Covid-19 og var þeim styrk ætlað að koma til móts við hluta af því tjóni sem KSÍ varð fyrir á tímum Covid-19.
Hvað tekjur af sjónvarpsrétti varðar voru tekjur sambandsins 145 milljónir króna yfir áætlun og var það vegna uppgjörs á sjónvarpsréttagreiðslum vegna tímabilsins 2018-2022.
Þá voru rekstrargjöld síðasta árs hjá KSÍ hærri en áætlanir gerðu ráð fyrir, urðu 1.748 milljónir króna en áætlanir miðuðu við 1.641 milljón króna
Heildarkostnaður landsliða á síðasta ári var áætlaður rúm 871 milljón króna en niðurstaða ársins var hins vegar 931 milljón króna.
Þá fór kostnaður við A-landslið kvenna fram úr áætlun vegna aukins kostnaðar við þátttöku í úrslitakeppni EM síðastliðið sumar.
Skrifstofu- og rekstrarkostnaður var 351 milljón króna og er hæsti einstaki liðurinn launakostnaður sem var 256 milljónir.
Ársreikningin fyrir árið 2022 hjá KSÍ má lesa í heild sinni hér.
Fjárhagsáætlun þessa árs gerir ráð fyrir því að tekjur KSÍ verði 1.856 milljónir króna og muni því dragast saman frá þeim 2.047 milljónum króna sem KSÍ hafði í tekjur á síðasta ári.
Þá er gert ráð fyrir því að heildargjöld ársins 2023 verði 1.736 milljónir króna samanborið við 1.748 milljónir króna árið 2022.
Klara Bjartmarz, framkvæmdarstjóri KSÍ segir jákvætt að sambandið nái að skila afgangi eftir ár eins og 2022.
,,En hafa þarf í huga að það sem veldur því eru einskiptisgreiðslur sem koma ekki aftur.“
Með því að skila afgangi sé hægt að styrkja eigið fé sambandsins sem geri því bæði okkur kleift að bregðast við óvæntum atburðum og að styðja betur við fótboltann.
,,Má þar nefna að á árinu gátum við aukið greiðslur til félaganna. Og á sama tíma og við viljum gera vel á hverju ári þurfum við einmitt líka að búa til sterkan grunn til framtíðar. “
