Í dag rennur út frestur fyrir hugsanlega nýja eigendur Manchester United til að leggja fram tilboð í félagið í einhvers konar formi.

Glazer-fjölskyldan hyggst selja félagið og verður ljóst í dag hverjir gætu raunverulega eignast félagið. Fresturinn rennur út klukkan 22 í kvöld. Það er ekki þar með sagt að United muni fá nýja eigendur inn fyrir þann tíma. Áhugasamir þurfa hins vegar að leggja fram tilboð.

Tilboð sem munu berast eftir að frestur kvöldsins rennur út munu verða skoðuð. Glazer-fjöldskyldan vill hins vegar selja sem fyrst. Talið er að félagið gæti orðið selt á næstu sex vikum.

Núverandi eigendur United vilja 6 milljarða punda fyrir félagið sem er gríðarlega verðmætt, en virði þess hækaði um 333 milljónir punda í gær.

Sir Jim Ratcliffe er sá sem hefur sýnt hvað mestan áhuga á að kaupa United. Hann hefur þegar lagt fram tilboð. Ratcliffe er ríkasti maður Bretlands og á þegar Nice í Frakklandi. Milljarðamæringurinn hefur stutt United allt sitt líf.

Þá hafa Katarar sýnt United áhuga sömuleiðis. Þeirra afstaða er hins vegar óljósari.

Í gær bárust þá fréttir af því að Sádi-Arabar ætluðu að gera tilboð í United.

Því hefur verið velt upp hvort kaup frá þessum löndum myndu ganga upp þar sem Paris Saint-Germain og Newcastle eru bæði í eigu þeirra. Fjölmiðlar í þessum löndum tala hins vegar um að um einkaaðila sé að ræða, ekki ríkið eins og í tilfellum PSG og Newcastle.

Það er ljóst að nóg verður að frétta fram á kvöld.