Leikmannahópur Manchester United er tvístraður þegar kemur að mögulegri endurkomu Mason Greenwood til félagsins.
Mál gegn Greenwood voru látin niður falla á dögunum. Hann hefur ekki spilað fótbolta í meira en ár í kjölfar þess að hann var ákærður fyrir tilraun til nauðgunar, stjórnandi hegðun og líkamsárás, allt gegn kærustu sinni Harriet Robson.
Nú er hann hins vegar laus allra mála.
Það er þó alls ekki útséð með framtíð Greenwood á knattspyrnuvellinum. United heldur nú sína eigin rannsókn á málinu áður en ákvörðun verður tekin.
Samkvæmt Times skiptist leikmannahópur United í tvo hópa er kemur að hugsanlegri endurkomu Greenwood.
Greenwood hefur verið á mála hjá United síðan hann var sex ára en ekki er ljóst hver næstu skref verða hjá vinnuveitendum hans að svo stöddu.
