Sara Björk Gunnarsdóttir greindi frá því að hún væri hætt að spila með íslenska landsliðinu nýlega. Þjálfari liðsins, Þorsteinn Halldórsson, var spurður út í ákvörðun hennar á blaðamannafundi í Laugardal í dag.

Þorsteinn hélt fundinn þar sem hann kynnti leikmannahópinn fyrir Pinatar Cup.

„Auðvitað er mikill missir af henni. Það vita allir hvað hún hefur gert fyrir íslenskan fótbolta, hversu mikill leiðtogi og sterkur karakter hún er, utan vallar líka,“ segir Þorsteinn á blaðamannafundinum.

Hann reyndi ekki að snúa ákvörðun Söru.

„Við áttum samtal. Fyrir mér snerist það ekkert um að snúa ákvörðun hennar við. Þetta er ákvörðun sem hún var búin að taka þegar við ræddum saman. Það var ekkert sem ég gat gert til að breyta því.“

Sara var fyrirliði íslenska landsliðsins áður en hún lagði landsliðsskóna á hilluna. Þorsteinn staðfesti á fundinum í dag að Glódís Perla Viggósdóttir myndi taka við því hlutverki nú.

Sara er á mála hjá Juventus á Ítalíu og einbeitir sér nú að því.