Sölvi Geir Ottesen er gestur í nýjasta þætti Chat After Dark. Þar fer fyrrum knattspyrnumaðurinn yfir víðan völl, meðal annars tíma sinn hjá FC Kaupmannahöfn.

Sölvi, sem lagði skóna á hilluna eftir þarsíðasta tímabil, segir frá því þegar Belginn Ariel Jacobs tók við FCK árið 2012. Þá hafði Sölvi leikið með Kaupmannahafnarliðinu við góðan orðstýr frá 2010.

Íslendingurinn var hins vegar ekki inni í myndinni hjá Jacobs.

„Þetta var algjör pappakassi,“ segir Sölvi ómyrkur í máli.

Hann segir frá því þegar hann gekk á fund þjálfarans og vildi svör fyrir því að hann væri ekki að fá að spila undir hans stjórn.

„Ég fór á fund með honum og spurði af hverju ég fengi ekki sénsinn, ég væri að standa mig vel á æfingum. Hann fór að telja upp mjög skrýtna hluti sem voru ástæðan fyrir því. Hann sagði mér að þegar við tækjum hringinn fyrir æfingar væri ég aðeins fyrir utan hringinn, ekki inni í hópnum. Svo þegar við værum að skipta yfir úr einni æfingu í aðra þá sparkaði ég boltanum stundum í markið og kom ekki strax. Svo kom ég stundum ekki fullklæddur á fundina sem voru haldnir fyrir æfingar. Þá var ég stundum að klæða mig í sokkana.“

Sölvi var steinhissa á þessu. „Ég bara, hvað á ég að gera við þessar upplýsingar?“

Sölvi fór frá FCK 2013 og hélt til Ural í Rússlandi. Hann lék einnig í Kína, Tælandi og Svíþjóð á ferlinum, auk þess að hann var hjá Víkingi R. hér heima. Hann varð Íslandsmeistari með liðinu 2021.