Félag á Englandi hefur sett sig í samband við Matteo Guendouzi, miðjumann Marseille.
L’Equipe fjallar um þetta en samkvæmt miðlinum vita vinnuveitendur Marseille ekki hvaðan tilboðið kom. Málið er nú skoðað og reyna Frakkarnir að komast til botns í því.
Því hefur þó verið hent fram að það sé Aston Villa sem hafi haft samband við Guendouzi og gert honum tilboð.
Þar er Unai Emery knattspyrnustjóri. Hann fékk miðjumanninn til Arsenal árið 2018 og þekkir því að starfa með honum.
Guendouzi er 23 ára gamall. Hann er samningsbundinn Marseille til 2025.
Kappinn átti fína spretti inn á milli hjá Arsenal en var hegðun hans oft gagnrýnd. Mikel Arteta, sem tók við af Emery hjá Arsenal, hafði ekki áhuga á að vinna með leikmanninum.
