Gareth Bale hefði getað orðið leikmaður Liverpool á sínum tíma er hann spilaði með Southampton.

The Athletic greinir frá þessu en njósnarar Liverpool mættu á unglingaliðsleik Southampton gegn Bolton árið 2005 til að fylgjast með David McGoldrick á þeim tíma.

Njósnararnir voru ekki lengi að taka eftir Bale sem lék þá í vinstri bakverði og reyndi félagið að fá hann í kjölfarið.

Liverpool neitaði hins vegar að borga pening fyrir Bale og bauð Southampton að fá miðjumanninn Darren Potter í skiptum.

Southampton hló að því tilboði Liverpool og heimtaði að fá pening aukalega sem stórliðið neitaði að samþykkja.

Bale samdi í kjölfarið við Tottenham og varð goðsögn hjá félaginu áður en hann hélt til Real Madrid fyrir risaupphæð.

Tottenham borgaði 10 milljónir punda fyrir Bale sem er nú búinn að leggja skóna á hilluna eftir mjög farsælan feril.