Ágúst Orri Þorsteinsson hefur undirritað þriggja ára samning við Breiðablik. Félagið kaupir Ágúst frá Malmö FF fyrir sömu fjárhæð og hann var seldur á fyrir tæplega ári síðan frá Breiðablik.
Ágúst er fæddur árið 2005 og spilaði upp yngri flokkana með Breiðabliki. „Þetta var lærdómsríkur tími hjá Malmö enda sterkir strákar í öllum stöðum”. segir Ágúst Orri.
„Klúbburinn er stór og sigursæll en ég hugsaði samt töluvert um það hvort þetta hefði verið rétt skref hjá mér að æfa og spila með U19 hjá Malmö eða vera að æfa og spila með meistaraflokki Breiðabliks”.
„Það hafði auðvitað líka áhrif þegar ég sá hvernig Blikum gekk í fyrra. Ég var búinn að koma inn við sögu í Íslandsmótinu 2021 og hugsaði með mér að ég hefði getað verið partur af þessu. Því lengur sem ég hugsaði þetta því ákveðnari varð ég í því að vilja fara aftur í Breiðablik”.
Breiðablik hefur styrkt hóp sinn hressilega í vetur en Ágúst Eðvald Hlynsson, Alex Freyr Elísson, Arnór Sveinn Aðalsteinsson, Eyþór Wöhler, Klæmint Olsen og Patrik Johannesen hafa allir samið við félagið.
