Fyrir viku síðan sagði Kristján Óli Sigurðsson frá því að Heimir Hallgrímsson væri að taka við karlaliði Vals eftir leiktíðina í Bestu deildinni.
Það kom því mörgum á óvart þegar Heimir var skráður á skýrslu í leik ÍBV gegn Víkingi Reykjavík á sunnudag. Landsliðsþjálfarinn fyrrverandi hefur verið Hermanni Hreiðarssyni til aðstoðar í sumar en Kristján sagði hann hættann hjá ÍBV fyrir viku síðan.
Samkvæmt því sem Kristján sagði í Þungavigtinni í gær var Heimir aðeins á bekknum gegn Víkingi þar sem Hermann Hreiðarsson, þjálfari liðsins, var í banni. Hann dregur ekki í land með að Heimir sé á leið til Vals.
Þá segir hann jafnframt að Heimir hafi verið staddur í stúkunni á leik Breiðabliks og Vals í gær, sem ýtir undir orðrómanna um að hann sé á leið á Hlíðarenda.
Ólafur Jóhannesson er þjálfari Vals sem stendur. Hann tók við af Heimi Guðjónssyni fyrr i sumar og gerði samning út leiktíðina.
Heimir Hallgríms á Kópavogsvelli í kvöld. Væntanlega bara því það eru góðir hamborgarar í boði. 🍔
— Kristján Óli Sigurðsson (@kristjanoli) September 5, 2022