Það eru fáir sparkspekingar í dag jafn umdeildir og Gabriel Agbonlahor sem er fyrrum leikmaður Aston Villa.

Agbonlahor er duglegur að fjalla um ýmis mál hjá TalkSport og hefur nú tjáð sig um stöðu varnarmannsins Trent Alexander-Arnold.

Trent hefur ekki byrjað þetta tímabil nógu vel en hann er leikmaður Liverpool og hefur einnig misst sæti sitt í enska landsliðinu.

Trent hefur áður spilað mjög vel í hægri bakverði landsliðsins og er einn af lykilmönnum Liverpool.

Gareth Southgate, landsliðsþjálfari Englands, virðist ætla að treysta á aðra leikmenn fyrir HM í Katar sem fer fram í lok árs.

Agbonlahor vonar innilega að Trent verði þó valinn í landsliðshópinn og segir sjálfur að hann myndi hætta ef hann yrði ekki valinn í sömu sporum.

,,Ef ég væri Trent þá myndi ég hætta í landsliðinu ef ég kæmist ekki í HM hópinn,“ sagði Agbonlahor.

,,Ég myndi hætta þar til nýr landsliðsþjálfari væri ráðinn til að gefa mér tækifæri.“