Javier Hernandez, fyrrum leikmaður Manchester United, fær ekki að fara með mexíkóska landsliðinu á HM í sumar.
Þetta hefur Gerardo Martino, landsliðsþjálfari Mexíkó, staðfest en Chicharito eins og hann er yfirleitt kallaður spilar í dag í Bandaríkjunum.
Chicharito leikur með LA Galaxy þar í landi og hefur skorað 34 mörk í 62 deildarleikjum á tveimur árum.
Martino hefur þó ekki áhuga á að velja sóknarmanninn í lokahópinn fyrir HM sem vekur töluverða athygli.
Chicharito er markahæsti leikmaður í sögu Mexíkó með 52 mörk í 109 landsleikjum.
Margir hafa gagnrýnt þessa ákvörðun Martino en Chicharito spilaði þó sinn síðasta landsleik fyrir þremur árum.
,,Þegar kemur að Chicharito þá er það svo einfalt að við ætlum að treysta á aðra framherja,“ sagði Martino.
,,Við munum reyna að velja 26 leikmenn sem henta okkar leikstíl. Við erum með tvo framherja sem geta spilað og tvo sem spila ekki. Það sem mér líkar við er að við erum ekki með of fáa leikmenn.“