„Karólína og Cecilía Rán Rúnarsdóttir eru báðar meiddar, Karólína á svolítið í land með að ná bata og Cecilía er ekki byrjuð á fullu á æfingum. Ég tók þá ákvörðun að velja hana ekki, ekki komin á fullt,“ sagði Þorsteinn Halldórsson landsliðsþjálfari eftir að hafa opinberað hópinn sinn fyrir leik í umspili um laust sæti á HM á næsta ári.
Íslenska liðið veit þó ekki hver andstæðingurinn verður því Portúgal og Belgía leika áður og sigurvegarinn þar leikur einn leik við Ísland um laust sæti á HM.
„Við förum til Portúgals í byrjun gluggans og verðum rétt hjá Faró og æfum þar, þegar við vitum hvert við eigum að fara þá fljúgum við tveimiur dögum fyrir leik á leikstað og tökum æfingu á keppnisvelli og svo leikur á þriðjudegi.“
Sara Björk Gunnarsdóttir miðjumaður Juventus lék ekki í Meistaradeildinni í vikunni en er þó ekki alvarlega meidd. „Hún meiddist raunverulega ekki í upphitun, hún var stíf fyrir leikinn og fann í upphitun að hún væri ekki klár. Það var ákveðið að taka ekki neina áhættu með að þetta yrði eitthvað verra, hún er klár.“
Varnarmaðurinn Sif Atladóttir er hætt og í hennar stað kemur Agla María Albertsdóttir. „Ákvörðunin er hennar að leggja landsliðskóna á hilluna, við getum kvatt hana á góðan hátt. Hún hefur verið flott í hópnum okkar, frábær leikmaður og fyrirmynd. Þetta var hennar ákvörðun, hún hefur verið inn og út úr liði hjá mér en spilað slatta af leikjum. Hefur verið partur af kjarna sem spilar flesta leikina, missir af flottum leiðtogum.“
„Ákvörðunin kom mér á óvart á þessum tímapunkti, hlutverk utan vallar? Í landsliðshóp ertu ekki settur í nein hlutverk heldur þú sem reyndur leikmaður eins og hún aðstoðar og er til staðar fyrir alla. Gott að geta leitað til hennar, hún hafði góða og sterka rödd í hópnum.“
Karólína Lea sem er einn mikilvægasti leikmaður liðsins er áfram meidd og óvíst er hvenær hún snýr í raun aftur. „Ég hef talað mjög reglulega við hana, ég get raunverulega ekki svarað því hvenær Karólína er tilbúin og Bayern ekki heldur. Þetta er í ferli sem er verið að vinna með, það er engin tímalína á þessu. Það var vonast eftir sex vikna dæmi en það kom í ljós í byrjun að þetta yrði lengra en það. Bayern hefur ekki hugmynd um það og ég veit það því varla.“
Þorsteinn segist ekki eiga sér óskamótherja í úrslitaleiknum um sæti á HM. „Kosturinn við það að við höfum ákveðna reynslu ef við spilum gegn Belgíu, við höfum ekki spilað gegn Portúgal. Við verðum að undirbúa okkur fyrir báða andstæðinga, vera með grunnvinnuna klára fyrir leikinn. Þetta set up er grillað, það er alveg ljóst. Við getum rætt það fram og til baka hversu sanngjarnt þetta er, það hefur aldrei verið einn leikur í umspili. Þetta er sérstakt umhverfi.“