Erik ten Hag, stjóri Manchester United er ósammála eigandanum Joel Glazer og Richard Arnold, stjórnarformanni, um næstu skref félagsins á félagaskiptamarkaðnum. Mirror segir frá þessu.
Ten Hag tók við United í sumar og styrkti liðið vel. Hann fékk til liðs við sig menn á borð við Antony, Casemiro, Lisandro Martinez og Tyrell Malacia á háar fjárhæðir.
Hollenski stjórinn telur að rétt skref væru að halda áfram að styrkja liðið í janúar. Glazer og Arnold vilja hins vegar bíða fram á næsta sumar og treysta á þá leikmenn sem nú eru hjá félaginu til að klára þetta tímabil.
Það er spurning hvort þetta verði ágreiningsmál á næstu vikum á Old Trafford.
United hefur staðið sig afar vel undanfarið eftir arfaslaka leiki í upphafi tímabils. Liðið er í fimmta sæti deildarinnar með tólf stig og hefur unnið fjóra leiki í röð.