Lionel Messi skoraði eitt marka Paris Saint-Germain í 1-3 sigri á Maccabi Haifa í Meistaradeild Evrópu. Þetta var 39. liðið sem Argentínumaðurinn skorar gegn í keppninni.
Með markinu í gær tók Messi fram úr Cristiano Ronaldo, sem hefur skorað gegn 38 liðum í Meistaradeildinni.
Þessir tveir hafa í meira en áratug verið kallaðir tveir bestu knattspyrnumenn sögunnar af mörgum.
Ronaldo tekur ekki þátt í Meistaradeildinni í ár. Hann er á mála hjá Manchester United, sem hafnaði í sjötta sæti ensku úrvalsdeildarinnar á síðustu leiktíð og tekur því þátt í Evrópudeildinni á þessari.
Portúgalinn reyndi hvað hann gat til að komast frá United í sumar en það tókst ekki.