Manchester United þarf nú að leita að öðrum kosti í fremstu víglínu eftir að möguleg kaup á Marko Arnautovic duttu upp fyrir.
Það vakti mikla athygli um liðna helgi þegar fréttir af tilboði United í Arnautovic bárust. Sóknarmðaurinn er 33 ára gamall, en hann lék áður með Stoke og West Ham áður en hann fór til Kína en þaðan fór hann svo til Bologna.
Bologna hafnaði 7,6 milljóna punda tilboði United en félagið er hætt við að halda áfram. Framherjinn vildi ganga í raðir United en möguleg koma hans vakti hörð viðbrögð stuðningsmanna.
Nú segir ESPN frá því að Man Utd hafi boðist að kaupa Alvaro Morata.
Morata er á mála hjá Atletico Madrid en hefur verið á láni hjá Juventus undanfarin tvö tímabil.
Þessi spænski framherji hefur einnig leikið fyrir stórlið Chelsea og Real Madrid.