Cristiano Ronaldo mætti á æfingu hjá Manchester United í morgunsárið. Það er því ekki útilokað að hann verði í liðinu sem mætir Brighton í fyrstu umferð ensku úrvalsdeildarinnar á sunnudag.
Ronaldo hefur verið orðaður frá Man Utd í allt sumar. Hann fór ekki með liðinu í æfingaferð til Asíu en spilaði æfingaleik gegn Rayo Vallecano í síðustu viku.
Ronaldo sneri aftur til Man Utd fyrir ári síðan, tólf árum eftir að hann yfirgaf félagið fyrir Real Madrid.
Man Utd olli hins vegar miklum vonbrigðum á síðustu leiktíð og hafnaði í sjötta sæti. Liðið leikur því ekki í Meistaradeild Evrópu á komandi leiktíð. Sjálfur átti Ronaldo gott tímabil. Hann skoraði 24 mörk í öllum keppnum.
Fyrr í dag var Ronaldo orðaður við Corinthians.
„Ég á mér stóra drauma. Þetta er Corinthians. Eru ekki Willian og Renato Augusto hér? Það er allt mögulegt í fótbolta og það er skylda mín að gera mitt besta fyrir Corinthians,“ segir Duilio Monteiro Alves, forseti brasilíska félagsins.
„Ég veit ekki hvort það er möguleiki. Við höfum ekki prófað þetta eða kafað dýpra. Við höfum hins vegar auga með honum, ef hann skyldi vilja spila í Brasilíu.“