Víkingur Reykjavík tók á móti pólska stórliðinu Lech Poznan í Sambandsdeild UEFA á Víkingsvelli í kvöld og vann stórkostlegan 1-0 sigur.
Þó nokkuð var um skakkaföll í liði Víkinga og til að mynda vantaði varnarmanninn reynda, Halldór Smára sem og framherjan stóra og stæðilega Nikolaj Hansen. Þá er liðið að finna taktinn án Kristals Mána Ingasonar sem var á dögunum seldur til Rosenborgar.
Jafnræði var með liðunum í fyrri hálfleik og ekki að sjá að Víkingar væru minni spámaðurinn eins og haldið var fram fyrir leik kvöldsins.
Ari Sigurpálsson fór á kostum í liði heimamanna og náði oft á tíðum að valda varnarmönnum gestana miklum vandræðum. Að sama skapi stýrði Pablo Punyed miðjunni af miklum sóma.
Það var rétt fyrir lok fyrri hálfleiks sem fyrsta og eina mark leiksins leit dagsins ljós og það gerði Ari Sigurpálsson eftir að hafa leikið á nokkra varnarmenn Lech Poznan. Ari lét vaða fyrir utan vítateig gestana og boltinn söng í netinu. Sannkallað flautumark í fyrri hálfleik.
Víkingar mættu mun ákveðnari til leiks í síðari hálfleik og fengu álitleg færi til þess að bæta við marki og án þess að gestirnir frá Póllandi yllu þeim miklum vandræðum á móti.
Fleiri mörk voru ekki skoruð í leiknum og því fóru Víkingar með virkilega sterkan 1-0 sigur af hólmi. Liðin mætast í síðari viðureign einvígisins eftir slétta viku í Póllandi.