Rebekah Vardy tapaði á dögunum meiðyrðamáli sínu gegn Coleen Rooney. Fyrir þremur árum síðan taldi Coleen sig hafa komist að því að Rebekah væri að leka upplýsingum um sig og sína í enska götublaðið The Sun.
Rebekah hefur ávallt neitað sök varðandi að hafa lekið upplýsingum um fjölskyldu Coleen Rooney í fjölmiðla og höfðaði í kjölfarið meiðyrðamál gegn Coleen sem hún að lokum tapaði. Orðspor hennar er nú sagt í molum.
Hún er þó ekki bitur út í Coleen, miðað við það sem hún sagði í viðtali við enska götublaðið The Sun.
„Ef ég myndi hitta hana úti á götu myndi ég spyrja hana hvort hún vildi koma á kaffihús,“ segir Rebekah.
„Lífið er of stutt til að vera langrækinn og bitur út í einhvern. Það er ekki ég, ég er ekki þannig.“