Grindavík er í níunda sæti Lengjudeildar karla þegar fjórar umferðir eru eftir. Liðið er þó tólf stigum frá fallsvæðinu.
Grindvíkingar féllu úr efstu deild 2019. Liðið hefur ekki komist mjög nálægt því að komast aftur upp síðan. Hrafnkell Freyr Ágústsson, sérfræðingur markaþáttar Lengjudeildarinnar, telur þó að liðið verði sterkara á næsta tímabili.
„Grindvíkingar eru að undirbúa liðið fyrir næsta tímabil. Þeir fengu smá fríspil þetta tímabilið, voru lengi að byggja upp lið í vetur, nýr þjálfari, byrjuðu svolítið upp á nýtt. Þetta er fínt tímabil hingað til,“ segir Hrafnkell í nýjasta þættinum.
„Það verður meiri pressa á þeim á næsta tímabili. Það er enginn að sækja Guðjón Pétur Lýðsson og fleiri góða til að hanga í Lengjudeildinni,“ segir þáttastjórnandinn Hörður Snævar Jónsson. Grindavík fékk Guðjón Pétur, sem er með mikla reynslu úr efstu deild, í félagaskiptaglugganum í júlí.
„Hugarfarið í Grindavík er þannig að þeir vilja fara upp á hverju einasta tímabili. En stundum þarftu bara að slaka á og byggja upp,“ segir Hrafnkell.
Markaþátt Lengjudeildarinnar í heild má sjá hér að neðan.