Ólafur Jóhannesson, þjálfari Vals, var nokkuð brattur í viðtali við Stöð 2 Sport eftir 2-2 jafntefli á útivelli gegn Íslandsmeisturum Víkings Reykjavík í Bestu deild karla gærkvöldi.
Valur lenti 2-0 undir í gær. Það voru Helgi Guðjónsson og Kyle McLagan sem skoruðu mörk Víkings. Tryggvi Hrafn Haraldsson minnkaði hins vegar muninn fyrir gestina áður en þeir jöfnuðu með sjálfsmarki Oliver Ekroth.
Eftir að 22 leikjum er lokið í Bestu deildinni í ár verður deildinni skipt upp í tvo hluta. Þar sem öll lið leika fimm leiki til viðbótar. Ólafur var spurður út í þeta fyrirkomulag í viðtalinu í gær.
„Það verður spennandi. Það eru fimm hörkuleikir sem öll lið fá,“ sagði Ólafur.
Sjálfur er hann hins vegar ekki of hrifinn. „Hvort að þetta sé rangt eða rétt fyrirkomulag, mér finnst það rangt en það er annað mál. Ég hef ekki tíma til að tala um það.“