Á vef Fotbollskanalen í Svíþjóð í dag er Óskar Hrafn Þorvalsdsson, þjálfari karlaliðs Breiðabliks, orðaður við stjórastöðuna hjá Norrköping í Svíþjóð.
Rikard Norling var rekinn frá Norrköping fyrir tæpum mánuði síðan og er félagið því í þjálfaraleit. Óskar Hrafn Þorvaldsson og Daniel Backstrom, þjálfari Sirius, eru nefndir til sögunnar sem hugsanlegir arftakar Norling.
Óskar Hrafn er á sínu þriðja tímabili með Breiðablik. Liðið er í kjörstöðu til að tryggja sér sinn fyrsta Íslandsmeistaratitil síðan 2010, er á toppi Bestu deildarinnar með 38 stig, níu stigum á undan Víkingi Reykjavík.
Norrköping er í tólfta sæti sænsku úrvalsdeildarinnar af sextán liðum.
Á mála hjá sænska félaginu eru fyrir Íslendingarnir Arnór Sigurðsson, Ari Freyr Skúlason, Andri Lucas Guðjohnsen og Jóhannes Bjarnason.