Chris Brazell, þjálfari karlaliðs Gróttu, lét öllum illum látum í leik liðsins gegn HK í Kórnum í síðustu viku, sem og eftir hann.
Brazell og þjálfarateymi hans létu vel í sér heyra á meðan leik stóð, þá sérstaklega er þeir vildu meina að leikmaður HK hafi gerst brotlegur í aðdraganda sigurmarks HK í leiknum. Heimamenn unnu leikinn 2-1.
Eftir leik vildi Brazell ná tali af Erlendi Eiríkssyni, dómara leiksins. Samkvæmt heimildum Fótbolta.net beið hann í um klukkustund fyrir utan klefana til að geta rætt við hann.
Þá kemur fram í frétt miðilins að hegðun Brazell í garð starfsfólks HK hafi ekki verið honum til sóma. Honum hafi að lokum verið vísað úr húsinu.
Málið var rætt í hlaðvarpsþættinum Dr. Football í gær. Þar kom fram að Erlendur hafi þurft fylgd út úr Kórnum eftir leik.
„Það voru sex menn sem þurftu að labba út með Ella Eiríks, á Íslandi í Kórnum,“ sagði Hrafnkell Freyr Ágústsson, sérfræðingur þáttarins. „Þetta er gjörsamlega galið.“
Hrafnkell telur að stjórnarmenn Gróttu muni bregðast harkarlega við hegðun Brazell. „Þeir hljóta að taka hann gjörsamlega á teppið.“