Óskar Hrafn Þorvaldsson, þjálfari Breiðabliks, ræddi við RÚV í kvöld eftir sigur á HK í 8-liða úrslitum Mjólkurbikars karla.
Óskar og hans menn unnu 1-0 sigur í Kórnum en Lengjudeildarliðið stóð vel í toppliði Bestu deildarinnar.
Óskar segir að verkefnið væri alltaf að fara vera erfitt og bendir á að það sé alltaf erfitt að spila í Kórnum.
,,Þetta var erfitt og við vissum það allan tímann að þessi leikur væri að fara vera erfiður. HK er erfitt heim að sækja. Þetta eru bikarleikir og sama hvaða deild þeir eru í þá hefur það rosalega litla þýðingu,“ sagði Óskar við RÚV.
,,Þetta er erfiður völlur og hefur verið undanfarin ár og við vorum meðvitaðir um það að þetta yrði erfitt verkefni.“
,,Spilamennskan okkar var ekki góð, við klúðruðum mörgum stöðum þar sem við gátum gert út um leikinn. HK gerði hlutina erfiða fyrir okkur og hótuðu því að gera okkur grikk.“
,,Völlurinn var frábær ekkert út á hann að setja, blautur allan tímann. Það er bara eitthvað við andrúmsloftið sem er skemmtilegt og tense eins og maður getur upplifað að þjálfa handbolta eða körfubolta. Það er eins og það séu 3000-4000 manns með 700 trommur þarna svo það er rosalega gaman að spila hér.“