Chelsea og Tottenham skildu jöfn á Stamford Bridge í dag en liðin áttust við í ensku úrvalsdeildinni.
Leikurinn var nokkuð fjörugur en fyrsta mark leiksins skoraði varnarmaðurinn Kalidou Koulibaly.
Koulibaly kom Chelsea yfir eftir 19 mínútur en hann kom boltanum í netið með laglegu skoti eftir hornspyrnu.
Chelsea var mun sterkari aðilinn í fyrri hálfleik en Tottenham tókst svo að jafna metin í þeim síðari.
Pierre-Emile Hojbjerg skoraði þá fyrir gestina með fínu skoti utan teigs sem Edouard Mendy réð ekki við.
Það mark dugði í níu mínútur en Reece James kom Chelsea svo aftur yfir á 77. mínútu eftir vandræðagang í vörn Tottenham.
Harry Kane skoraði svo jöfnunarmark fyrir Tottenham í blálokin en margir hjá Chelsea voru hundfúlir með dómgæsluna í leiknum.
Eftir lokaflautið varð allt vitlaust á hliðarlínunni er þeir Antonio Conte, stjóri Tottenham og Thomas Tuchel, stjóri Chelsea áttust við.
Það var í raun slegist við hliðarlínuna eins og myndbandið hér fyrir neðan sýnir.
TUCHEL VS CONTE: ROUND TWO!!! 🤬🤬 pic.twitter.com/XhWuOU4fwD
— Sky Sports Premier League (@SkySportsPL) August 14, 2022