Sagnfræðingurinn Stefán Pálsson er gestur í nýjasta þætti Chess After Dark. Stefán er mikill knattspyrnuáhugamaður og í þættinum fór hann meðal annars yfir af hverju hann valdi sér þau knattspyrnulið sem hann styður.

Val Stefáns á liðum til að styðja í fótboltanum var nefnilega ekki hefðbundið. Hann styður nefnilega B-deildarlið Luton Town á Englandi og Fram á Íslandi, þrátt fyrir að vera úr Vesturbænum.

„Það var fullkomlega rökrétt ákvörðun á níunda áratugnum. Við tókum öll okkar tískuákvarðanir á níunda áratugnum sem við sjáum eftir,“ segir Stefán um stuðning sinn við Luton.

„Þegar ég vel Luton eru þeir nýliðar í efstu deild og David Pleat að þjálfa,“ segir hann og bendir á að Luton hafi einnig orðið deildabikarmeistari á þessum árum.

Þá útskýrði Stefán hvers vegna hann heldur með Fram, en ekki KR, þrátt fyrir að vera Vesturbæingur.

„Ég er Vesturbæingur. Þá hnjóta margir um það af hverju í andskotanum ég sé Framari,“ segir Stefán léttur.

„Svarið er að þetta var miklu blandaðra á þessum tíma. Það var ekki þessi rosalegi hverfaandi, að allir krakkarnir í grunnskólanum væru í jogginggöllum merktum félaginu og allir fengju að vera með. Það fengu ekkert allir að vera með. KR var með A-lið og B-lið og þeir sem náðu ekki í það var bara sagt að hypja sig.“

„KR á þessum árum var ekkert skemmtilegt lið. Þetta náðu reyndar þeim glæsilega árangri einu sinni að verða í öðru sæti á Íslandsmóti með neikvæða markatölu, markatöluna 18:19 í átján leikjum. Þetta er KR-lið æsku minnar, tannlausir, rauðhærðir varnarjaxlar.“

Svo fór afi Stefáns að taka hann með sér á völlinn á leiki Fram.

„Hann hafði verið formaður Fram mörgum árum fyrr. Hann hafði dottið aðeins út úr fótboltanum og fannst fínt að komast inn í hann aftur með því að taka yngsta barnabarnið á völlinn. Þá verður maður náttúrulega bara Framari.“