Aga- og úrskurðarnefnd Knattspyrnusambands Íslands dæmdi Arnar Grétarsson, þjálfara KA, í fimm leikja bann fyrir hegðun sína í leik gegn KR í síðustu viku.
Arnar fær bannið fyrir að orð sem hann lét falla í garð Sveins Arnarssonar, fjórða dómara í leiknum. Hann hafði fengið rautt spjald í leiknum og því sjálfkrafa tveggja leikja bann. Aga- og úrskurðanefndin bætti svo þremur leikjum við fyrir eðli brotsins.
Íþróttafréttamaðurinn Guðjón Guðmundsson fór á Twitter og gagnrýndi KSÍ harðlega fyrir bann Arnars og spurði „á hvaða ferðalagi menn væru.“
Í svari við færslu Gaupa, eins og hann er gjarnan kallaður, skrifar Stefán Hrafn Hagalín að bannið hafi verið réttlátt og í raun of stutt. „Addi veitist að varadómara leiksins í leiknum með svívirðingum, eftir leikinn í viðtölum með persónuárásum og daginn eftir úti á bílastæði við KA heimilið þar sem dómarinn var að skutla barninu sínu á æfingu. 5 leikja bannið of stutt. Uppeldisfélagið mitt KA ætti að bæta 5 við,“
Guðmundur Óli Steingrímsson, sem lék með KA fyrir um áratug, segir þetta ekki rétt. „Úti á bílastæði ? Nei nei, hann settist fyrir framan skrifstofuna hjá Arnari og fékk sér kaffibolla. Arnar rak hann út.“
KSÍ hefur ekki birt dóminn í heild og þá svara KA-menn ekki í símann til að svara fyrir þennan þunga dóm Arnars.