Raheem Sterling, leikmaður Manchester City, hefur samið um eigin kaup og kjör við Chelsea og mun líklega ganga í raðir félagsins á næstunni. Mirror segir frá.
Real Madrid, Bayern Munchen, Barcelona, Paris Saint-Germain og Liverpool hafa öll verið sögð áhugasöm um enska landsliðsmanninn en Chelsea hefur nú unnið kapphlaupið.
Lundúnafélagið mun borga Man City 45 milljónir punda fyrir þjónustu Sterling, sem hefur verið hjá Englandsmeisturunum síðan 2015, þá kom hann frá Liverpool.
Sterling vill vera fastamaður í byrjunarliði hjá félagi sínu. Man City gat ekki boðið honum það, þó svo að hann væri mikilvægur hluti af hópnum.
Sterling átti samtal við Pep Guardiola, stjóra City, sem er sagður skilja afstöðu leikmannsins, sem mun yfirgefa Manchester á góðum nótum.