Hannes Þór Halldórsson, fyrrum landsliðsmarkvörður, var gestur í hlaðvarpsþættinum Draumaliðið sem er í umsjón Jóa Skúla.

Gestir þáttarins fá það verkefni að velja sitt draumalið skipað 11 leikmönnum sem þeir léku með á ferlinum en það er rætt um ýmsa aðra hluti.

Eiður Aron Sigurbjörnsson lék með Hannesi bæði hjá Sandnes Ulf í Noregi og í Val en hann kemst ekki í liðið sem vekur kannski töluverða athygli enda um mjög góðan varnarmann að ræða.

Hannes veit að Eiður verður ekki sáttur með það val en Grétar Sigfinnur Sigurðarson kemst í byrjunarliðið eftir að hafa leikið með markmanninum í Val.

Hannes talar mjög vel um Grétar sem var á sínum tíma tjáð að hann mætti yfirgefa KR en tók það hins vegar ekki í mál.

,,Sko, ég hefði eiginlega átt að spila þriggja manna vörn því það er maður sem mun núna strax eftir að hafa hlustað á þáttinn hafa samband við mig og hóta mér hnefasamloku og hann heitir Eiður Aron Sigurbjörnsson og er mögulega bestur af þessum hafsentum,“ sagði Hannes.

,,Hann er á varamannabekknum og fyrstur inn því það er endalaust hægt að tala um Grétar Sigfinn Sigurðarson sem er í liðinu. Ástæðan fyrir því að hann er í liðinu fram yfir Eið er að við urðum tvisvar sinnum Íslandsmeistarar saman.“

,,Eiður spilaði með mér í Sandnes og sá tími sem við spiluðum saman urðu ekki að glory times skilurðu og svo langaði mig svo mikið að tala um Grétar. Árið 2013, hann á skilið svo mikið respect fyrir það ár að það hálfa væri bara ekki nóg.“

,,Hann hélt áfram og áfram og var byrjaður að spila leiki í bakverði því það vantaði menn og þeir neyddust til að spila honum og eitthvað svona. Það er svo margt við þetta og ekki bara þetta, þetta er bara algjör triumph saga. Svo endar hann á því ég man ekki hvort það hafi verið mannekla eða eitthvað en hann kemur sér í liðið og endar á að spila alla leiki ef ég man rétt og var valinn leikmaður ársins.“

,,Hann er eins mikill KR-ingur og þú verður er að vera og hann vildi ekki fara úr KR, hann sætti sig ekki við það að það væri verið að senda hann í burtu. Hann kom sér í liðið, grændaði sig aftur inn, varð Íslandsmeistari og besti leikmaður liðsins. Það er bara geggjað.“