Brynjar Gauti Guðjónsson mun ekki spila með Fram gegn Stjörnunni í næstu viku. Er þetta vegna samkomulags sem félögin gerðu á milli sín þegar leikmaðurinn gekk í raðir Fram frá Stjörnunni á dögunum.
Einhverjir hafa gagnrýnt þetta. Þar á meðal er Stefán Pálsson, Framari og sagnfræðingur.
Hann ritar eftirfarandi pistil á Facebook-síðu sína:
Ég hef skammast yfir þessu áður og geri það enn á ný jafnvel þótt mínir menn komi nú við sögu.
Í mínum huga eru svona samningar eiginlega ekkert annað en svindl og brot á reglum. Hugsum okkur ef upp kæmist að fjársterkt lið í deildinni borgaði mótherjum fyrir að hvíla sína bestu menn. Engum þætti slíkt samkomulag eðlilegt og líklega yrði báðum félögum refsað. – Það er samt enginn eðlismunur á slíku og þessu hér, þar sem Fram og Stjarnan gera viðskiptasamning sín á milli og hluti af því samkomulagi er að Fram stilli fram veikara liði gegn Stjörnunni en öllum öðrum félögum.
Ljótt, ljótt sagði fuglinn!