Lögreglan í Manchester veit ekki hver næstu skref í máli Gylfa Þórs Sigurðssonar verða. Þetta segir hún í svari við fyrirspurn 433.is.
Gylfi var handtekinn fyrir ári síðan, grunaður um kynferðisbrot gegn ólögráða einstaklingi. Hann hefur síðan verið laus gegn tryggingu og í ferðabanni frá Englandi. Tryggingin rann út á laugardag.
„Eins og áður hefur komið fram er trygging hans á enda og eins og staðan er núna vitum við ekki hver næstu skref verða,“ segir í svari lögreglunnar.
Gylfi Þór er nú án félags en samningur hans við enska úrvalsdeildarfélagið Everton rann út um síðustu mánaðarmót. Gylfi er 32 ára gamall en hann hefur verið í atvinnumennsku í fótbolta í 17 ár.
Hann lék ekkert með Everton á síðustu leiktíð eftir að lögreglan í Manchester hóf rannsókn vegna gruns um kynferðisbrot gegn ólögráða einstaklingi.