Íslenska karlalandsliðið í knattspyrnu gerði í kvöld 1-1 jafntefli við Albaníu í B-deild Þjóðadeildar UEFA. Jafnræði var með liðunum til að byrja með í leiknum en á 30. mínútu kom Seferi, sóknarmaður Albana gestunum yfir. Boltinn datt fyrir fæturna á Seferi eftir að Rúnar Alex hafði varið boltann áður út í teig. Þetta reyndist eina mark fyrri hálfleiks.
Íslendingar komu tilbúnir til leiks í þeim seinni. Það tók liðið um það bil þrjár mínútur að jafna metin. Það gerði Jón Dagur Þorsteinsson eftir skyndisókn.
Eftir leik er mest rætt um þá staðreynd að Albert Guðmundsson var ónotaður varamaður í leiknum en Andri Lucas Guðjohnsen byrjaði leikinn í fremstu víglínu.
„Mér fannst Andri Lucas geggjaður, spilaði eins og alvöru target senter. Hann var góður heilt yfir, það er hans harðfylgi sem skapar þetta mark,“ sagði Kári Árnason á Viaplay.
Kári var svo spurður út í það af hverju Albert tók ekki þátt í leiknum.
„Einfaldlega af því að þú færð þetta ekki frá honum, hár bolti sem kemur upp. Andri Lucas er að djöflast í þeim, hann er einn frammi. Ég geri tilkall til þess að Andri Lucas sé framherji númer eitt upp á topp,“ sagði Kári.
„Ég er ekki að setja út á Albert sem, það vita allir að hann er með gæði. Hann fittar ekki inn í þetta, þú sást hvernig kantmenn voru að djöflast allan leikinn. Ég er ekki viss um að Albert væri í sama gír ef hann væri út á kant.“
Albert var svo aftur til umræðu síðar í þættinum og þá sagði Kári. „Hann verður ekkert að koma inná, hann hefur ekki sýnt að hann sé yfirburða maður með landsliðinu að hann eigi að spila alla landsleiki. Hann hentar ekki alltaf í þetta game,“ sagðI Kári.
Rúrik Gíslason var einnig í settinu og fór yfir stöðu Alberts. „Ég ætla að taka upp hanskann fyrir Albert, það hafa það allir í sér að berjast. Ég velti því fyrir mér, honum er ekki skipt inná,“ sagði Rúrik
Rúrik ráðleggur Alberti að fara ekki í fýlu, það muni engu skila. „Það er aldrei gott að fara í fýlu eða ætla að sanna eitthvað point, Arnar er stjórinn og tekur ákvarðanir. Þú verður að virða þær, ef þú ert settur á bekkinn þá ferðu ekki í fýlu. Ég vona að Albert svari þessu, við höfum not fyrir hann,“ sagði Rúrik.
Rúrik segir umræðuna í kringum liðið of vinalega á köflum.
„Mér finnst öll umræða núna, mér finnst þetta of vinalegt. Einn sigurleikur í 14 leikjum, við erum á heimavelli. Ég hefði viljað sjá meiri greddu í að vinna leikinn, Jón Dagur var tekinn út af og ég set spurningarmerki við þá skiptingu. Mér finnst þetta of vinaleg umræða, lið í þróun en við viljum úrslit,“ sagði Rúrik.