Arnór Sigurðsson var nokkuð sáttur með frammistöðu íslenska landsliðsins í 1-1 jafnteflinu gegn Albönum í kvöld en hefði þó viljað þrjú stig.
„Það er svekkelsi að ná ekki að klára leikinn. Mér fannst við spila fínan seinni hálfleik,“ sagði Arnór.
Íslenska liðið kom mun betur inn í seinni hálfleikinn en þann fyrri í kvöld. „Við vildum pressa þá hærra. Við ætluðum að gera það í fyrra en það gekk ekki alveg,“ sagði Arnór um það sem rætt var í hálfleik.
Arnór var úti kuldanum hjá félagsliði sínu, Venezia, á leiktíðinni og líður vel með að fá mínútur með landsliðinu. „Það er bara geggjað. Það skiptir miklu máli fyrir mig persónulega að koma aftur inn á völlinn.“
Um þróunina á landsliðinu í heild sagði Arnór: „Það er hellingur af jákvæðum punktum en auðvitað mikið líka sem þarf að laga.“