Dregið var í fyrstu umferð undankeppni Meistaradeildar Evrópu í kvennaflokki í dag. Breiðablik og Valur voru í pottinum.
Fjögur lið eru dregin saman sem mætast í undanúrslitum og svo úrslitaleik um að komast áfram á næsta stig keppninnar.
Valur mætir Hayasa frá Armeníu en Pomurje Beltinci frá Slóveníu og Shelbourne frá Írlandi eru einnig í riðlinum og mætast í hinum undanúrslitaleiknum. Sigurvegarnir mætast svo í úrslitaleik um sæti í annari umferð.
Breiðablik mætir Rosenborg. Þar er á mála Selma Sól Magnúsdóttir. Sigurvegarinn úr leiknum mætir Minsk frá Hvíta-Rússlandi eða Slovacko frá Tékklandi.
Það er óhætt að fullyrða að Valskonur hafi verið töluvert heppnari með drátt.
Undanúrslitaleikirnir fara fram þann 18. ágúst næstkomandi.