Raphinha, vængmaður Leeds United, er ansi eftirsóttur þessa dagana. Hann gæti farið frá félaginu en það verður alls ekki ódýrt.
Arsenal, Barcelona, Chelsea og Tottenham eru öll sögð hafa áhuga á Brasilíumanninum.
Sjálfur vill hann helst komast til Barcelona. Katalóníufélagið er hins vegar í fjárhagsvandræðum. Næsti kostur Raphinha er talinn vera Chelsea. Arsenal og Tottenham komi hins vegar einnig til greina.
Leeds vill þó fá 65 milljónir punda fyrir leikmanninn. Það er spurning hvort eitthvað af ofantöldum félögum rífi þá upphæð fram.
Raphina kom til Leeds frá Rennes árið 2020 fyrir 17 milljónir punda. Hann hefur skorað 17 mörk og lagt upp 11 í 66 leikjum fyrir félagið.
Leeds bjargaði sér naumlega frá falli í lokaumferð ensku úrvalsdeildarinnar á síðustu leiktíð.