Alþjóða knattspyrnusambandið, FIFA, hefur ákveðið að framlengja reglur sem eru í gildi er snúa að leikmönnum sem verða fyrir áhrifum stríðsins í Úkraínu.
Leikmenn og þjálfarar sem ekki komast að samkomulagi við félög sín um starfslok eða önnur úrræði fyrir 30. júní mega slíta samningi sínum við félögin tímabundið, eða þar til 30. júní 2023.
Á þetta við leikmenn eins og Arnór Sigurðsson. Hann er á mála hjá CSKA Mosvku. Landsliðsmaðurinn var á láni hjá Venezia á nýafstaðinni leiktíð en samkvæmt öllu ætti hann að snúa aftur til Rússlands. Þar er hann með samning til ársins 2024.
Nýju reglurnar þýða hins vegar að hann geti farið annað í ár, án þess að CSKA geti nokkuð um það sagt.
Arnór ræddi við 433.is um stöðu sína hjá CSKA í síðasta landsleikjaglugga. „Eins og staðan er núna á ég tvö ár eftir. Ég þarf að sjá hvað gerist. Það kemur í ljós.“
„Staðan (Í Rússlandi) er náttúrulega ekkert frábær. En Hörður (Björgvin Magnússon) var þarna. Ég talaði aðeins við hann um hvernig þetta var. Það mun kannski ekki hafa mikið að segja.“