Í gær birtist grein á The Athletic þar sem börn deila reynslu sinni frá úrslitaleik Meistaradeildarinnar í París í síðasta mánuði. UEFA hefur verið harðlega gagnrýnt fyrir skipulagið á leiknum. Fjöldi fólks komst inn án miða og mikill troðningur myndaðist. Franska lögreglan hefur einnig legið undir mikilli gagnrýni, meðal annars fyrir að beita táragasi gegn saklausu fólki, þar á meðal börnum.
Noel var eitt af þeim börnum sem lentu í hremmingum fyrir utan völlinn í París. „Það var einn maður sem hafði ruðst fremst í röðina. Hann sagði mér að hann vildi fá miðann minn. Hann sneri sér svo að bróður mínum og sagði að hann myndi stinga pabba okkar,“ sagði Noel.
Noel hélt áfram. „Á einum tímapunkti stefndum við að steypusúlu og ég hélt við myndum klessa á hana. Ég var hræddur. Fólk var að segja að þetta væri eins og í Hillsborough.“
Fleiri börn komu einnig fram og eitt þeirra sagði til að mynda „ég hélt í alvöru að ég myndi deyja.“
„Við gerðum ekkert rangt. Við fórum bara á fótboltaleik til að horfa á félagið sem við elskum,“ sagði annað barn.