Suður-Kóremaðurinn Je-wook Woo er farinn frá Lengjudeildarliði Þórs. Þorlákur Árnason, þjálfari liðins, staðfesti þetta í samtali við Fótbolta.net.
Hinn 28 ára gamli Woo kom til Þórs fyrir tímabilið. Hann á nú von á barni og er meiddur á rifbeinum að sögn Þorláks.
„Hann meiddist í mars á rifbeinum og þau meiðsli hafa verið að koma og fara, erfitt að eiga við þau meiðsli. Hann er síðan að verða pabbi og kærasta hans er úti í Kóreu. Við komumst að samkomulagi, stjórnin og hann, að hann myndi fara heim. Hann er búinn að spila sinn síðasta leik fyrir okkur og er meiddur eins og staðan er núna,“ sagði Þorlákur.
„Þessi meiðsli og sú staðreynd að hann er að verða pabbi eru ástæðurnar fyrir þessari niðurstöðu. Að verða pabbi er svolítið öðruvísi í Asíu þar sem þú oftast eignast einungis eitt barn. Okkar fannst þetta besta lausnin, erum búnir að vera bíða í einn og hálfan mánuð með þessi meiðsli. Þetta varð bara niðurstaðan, því miður.“
Þór er í níunda sæti Lengjudeildar karla með fimm stig eftir sex umferðir.
Viðtal Fótbolta.net við Þorlák má lesa í heild hér.