Teitur Örlygsson, fyrrum körfuboltaleikmaður og þjálfari, er kominn með nóg af neikvæðni í kringum íslenska karlalandsliðið ef marka má færslu hans á Twitter.
Ísland gerði 2-2 jafntefli við Ísrael í Þjóðadeildinni í kvöld. Jón Dagur Þorsteinsson og Þórir Jóhann Helgason skoruðu mörk liðsins.
Umræðan í kringum liðið hefur verið fremur neikvæð undanfarna mánuði.
„Finnst það ansi sjúkt að hluti manna sem fjalla opinberlega um fótbolta virðast hlakka yfir óförum Íslands. Oft til að upphefja rotið egó með enga innistæðu. Enga, man ekki eftir að þessir háværustu spiluðu í efstu deild. Sestu niður og þegiðu,“ skrifaði Teitur á Twitter.
Íslenska liðið hefur í þessum landsleikjaglugga gert tvö jafntefli við Ísrael og eitt við Albaníu. Þá vann það 0-1 sigur á San Marínó þar sem frammistaðan var þó ekki upp á marga fiska. Gagnrýnisraddirnar voru hvað hæstar eftir þann leik.