Það er allt í rugli fyrir utan Stade De France, leikvanginn þar sem úrslitaleikur Meistaradeildar Evrópu á að fara fram í kvöld. Nú er greint frá því að búið sé að loka einhverjum af aðgönguhliðunum af engri sérstakri ástæðu.
Nú þegar er búið að fresta leiknum til 19:36.
Einhverjir stuðningsmenn hafa reynt að klifra yfir hliðin og inn á völlinn. Þá er greint frá því að franska lögreglan hafi beitt táragasi á fólk, margt af því hefur ekkert til saka unnið og er jafnvel mætt með börnin sín á völlinn. Þá hafa einhverjir sagt frá því á Twitter að óprúttnir aðilar hafi ráðist á stuðningsfólk fyrir utan völlinn.
Marvin Matip, bróðir Joel Matip, leikmanns Liverpool, var fyrir utan völlinn með óléttri eiginkonu sinni og þurfti að flýja vegna táragasins sem rigndi yfir stuðningsmenn.
„Skipulagið er ekki úrslitaleik Meistaradeildarinnar sæmandi. Að nota táragas í kringum börn og saklausa stuðningsmenn er hættulegt,“ sagði Marvin Matip.