Líklegt er að hópur sem er leiddur áfram af Todd Boehly taki við sem nýr eigandi Chelsea á mánudag.
Yfirtaka þeirra hefur legið í loftinu og var gengið frá samkomulagi á milli allra aðila í gærkvöldi.
Þar með er tíma Roman Abramovich sem eiganda Chelsea lokið. Rússinn sendi frá sér yfirlýsingu í morgun.
„Það eru þrír mánuðir síðan ég tilkynnti að ég ætlaði að selja Chelsea. Á þessum tíma hefur félagið unnið hart að því að finna réttan kaupanda sem væri best stakk búinn til að leiða félagið áfram. Eignarhaldið á þessu félagi fylgir mikil ábyrgð. Síðan ég kom til Chelsea fyrir næstum 20 árum hef ég komist að því hversu langt þetta félag geur náð. Markmið mitt hefur verið að sjá til þess að næsti eigandi hafi metnaðinn til að leiða karla- og kvennaliðið í átt að árangri. Ég er ánægður með að það sé komin niðurstaða í þetta mál og ég óska nýjum eigendum alls hins besta. Það hefur verið mikill heiður að vera hluti af þessu félagi og vil ég þakka öllum leikmönnum, stuðningsmönnum og starfsmönnum fyrir,“ er meðal þess sem segir í yfirlýsingunni.