Guðmundur Magnússon sóknarmaður Fram missti stjórn á skapi sínu á sunnudag og vann skemmdarverk á auglýsingaskilti Breiðabliks. Þetta sést augljóslega á myndbandi og myndum.
Atvikið sást í sjónvarpinu og beint eftir atvikið mátti sjá skemmdina á skiltinu, skemmdin sást svo enn betur í gær þegar Breiðablik og Valur áttust við í Bestu deild kvenna.
Guðmundur sem hafði skorað í leiknum varð ansi reiður þegar Höskuldur Gunnlaugsson skoraði þriðja mark Blika í leiknum og kom liðinu í 3-2. Blikar unnu að lokum 4-3 sigur í fjörugum leik.
Eftir markið hljóp Guðmundur að skiltinu og sparkaði í það af öllu afli svo nú er stór blettur á skiltinu þar sem auglýsingarnar rúlla í gegn.
Skemmdin sást betur í leik kvennaliðs Blika í gær en Eysteinn Pétur Lárusson framkvæmdarstjóri Breiðabliks var ekki meðvitaður um málið þegar 433.is ræddi við hann í dag en hann sagðist ætla að skoða málið eftir ábendingu blaðamanns.
Skemmdin á skiltinu sést svo greinilega á myndunum hér að neðan.