Skærustu stjörnur Liverpool, Mohamed Salah og Sadio Mane, verða báðir samningslausir næsta sumar. Í dag tjáðu þeir sig báðir um stöðu mála hjá sér og var hljóðið í þeim ansi mismunandi.
„Ég verð áfram hjá Liverpool á næstu leiktíð, það er á hreinu. Ég hugsa ekki um samninginn eins og er,“ sagði Salah.
Mane var hins vegar ekki tilbúinn að gefa neitt upp. „Það verða viðræður eftir tímabilið. Ég mun tjá mig eftir úrslitaleik Meistaradeildarinnar,“ sagði Senegalinn.
Þeir félagar voru í viðtali fyrir úrslitaleik Liverpool og Real Madrid í Meistaradeild Evrópu. Leikurinn fer fram næstkomandi laugardag. Liverpool hefur harma að hefna en Real Madrid vann úrslitaleik liðanna í sömu keppni fyrir fjórum árum síðan.