Hólmar Örn Rúnarsson, þjálfari Njarðvíkur og fyrrum leikmaður Keflavíkur, er í viðtali við Víkurfréttir í tilefni þess að Njarðvík og Keflavík mætast í grannaslag í Mjólkurbikarnum á morgun. Í viðtalinu er Hólmar Örn ómyrkur í máli gagnvart stjórn knattspyrnudeildar Keflavíkur og vill meina að framkoma hennar í sinn garð sem og annarra fyrrum leikmanna liðsins hafi verið fyrir neðan allar hellur.
Hólmar Örn segir að þáverandi formaður knattspyrnudeildar Keflavíkur sem og varaformaður deildarinnar hefðu geta staðið betur að starfslokum sínum, Einars Orra Einarssonar og Harðar Sveinssonar hjá Keflavík árið 2018 en Hólmar á yfir 200 leiki fyrir félagið á sínum ferli.
,,Eftir slakt tímabil var skuldinni skellt á okkur félagana og okkur beinlínis hent í ruslið í orðsins fyllstu merkingu – eftir allt sem við höfðum gert fyrir félagið,“ segir Hólmar Örn og á þá við tímabilið 2018 þegar að Keflavík vann ekki leik í efstu deild og féll niður í 1. deild með aðeins 4 stig.
Hólmar Örn vill meina að hann, Einar Orri og Hörður hafi verið látnir taka sökina fyrir slæmu gengi Keflavíkur, skuldinni hafi verið skellt á þá.
„Viðskilnaðurinn við Keflavík var sár og maður jafnar sig ekki svo auðveldlega eftir svona spark – en nú er kominn tími til að jafna um sakirnar,“ segir Hólmar í samtali við Víkurfréttir og á þá við leik Keflavíkur og Njarðvíkur í Mjólkurbikarnum á morgun.
,,Við munum gefa okkur alla í leikinn og sjá til þess að Keflavík komist ekki lengra í bikarkeppninni þetta árið. Það verður enginn afsláttur veittur á komandi miðvikudag.“
Í aðdraganda leiksins var gerður skets sem á að sýna það hvernig framkoma stjórnar knattspyrnudeildar Keflavíkur á að hafa verið í garð Hólmars, Einars og Harðar.