Síminn Sport verður með sérfræðinga sína á Etihad-vellinum í Manchester á stórleik Manchester City og Liverpool, toppliðanna í ensku úrvalsdeildinni, á morgun. Tómas Þór Þórðarson, ritstjóri enska boltans hjá Símanum, fór yfir ferðina og leikinn sjálfan í þættinum Íþróttavikan með Benna Bó á Hringbraut í gærkvöldi.
„Þetta verður rosalegur leikur. Fyrri leikur liðanna er einn sá besti sem maður hefur séð í háa herrans tíð í sjónvarpinu,“ sagði Tómas.
„Að kalla þetta úrslitaleik er ekkert ofsögum sagt,“ sagði Tómas. „Auðvitað geta allir misstigið sig en þessi lið eru í svo góðum takt. Mér finnst líklegt að það lið sem verður í bílstjórasætinu eftir leik taki þann stóra í maí.“
Man City var með 13 stiga forskot í byrjun árs. Liverpool hefur gert virkilega vel í því að koma til baka og narta í hælana á þeim. Tómas Þór segir að Klopp og hans menn eigi hrós skilið fyrir að hafa ekki einfaldlega sett allt púður í aðrar keppnir. „Hversu auðvelt hefði verið fyrir Liverpool að setja fókusinn á bikaranna, að fá fleiri bikara? Því þrátt fyrir það ótrúlega þrekvirki sem Jurgen Klopp hefur unnið með Liverpool er bikarasafnið ekki stórt. Það er nokkuð glæsilegt með Champions League og Premier League en þeir eru ekkert margir.“
Tómas Þór segir að umfjöllunin sé jákvæðari í garð Liverpool. Það sé hins vegar að hluta til vegna þess mikla stöðugleika sem City hefur sýnt lengi. Það þyki ekki lengur mikil tíðindi að þeir vinni leiki. „Það er meiri byr í seglin hjá Liverpool á meðan City bara vinnur og vinnur. Ég held að City stuðningsmenn séu margir svolítið pirraðir á því að umfjöllunin um þá er svolítið eins og þeir vinni bara alltaf. En það er af því þeir hafa ekki lent í miklum öldudal í gegnum árin.“
Sem fyrr segir verður Síminn Sport á staðnum á morgun. „Við ætlum að fara þarna út með tökulið og leikstjóra og verðum að taka efni á bakvið tjöldin líka, “ sagði Tómas. Þátturinn Völlurinn verður í beinni frá Etihad. „Spenningurinn fyrir að sjá leikinn persónulega er mikill en líka spenningurinn fyrir að fá að færa þetta heim í stofu.“„Við verðum í hringiðjunni að reyna að færa ykkur aðeins nær Premier League. Svo ætlum við að gera það sama á Liverpool-Manchester United.“