Jón Daði Böðvarsson, framherji íslenska landsliðsins í knattspyrnu, er að ganga í gegnum endurnýjun lífdaga hjá nýja félagi sínu, Íslendingaliðinu Bolton. Rætt var um stöðu Jóns Daða í þættinum Íþróttavikan með Benna Bó og þá staðreynd að Íslendingar eru elskaðir þar eftir afrek fyrrum atvinnumanna þjóðarinnar í knattspyrnu.
Benedikt Bóas, umsjónarmaður þáttarins, spurði fyrrum framherjann Albert Brynjar Ingason sem var einn af sérfræðingum þáttarins, hvort það skipti ekki máli að finna fyrir svona mikilli ást frá stuðningsmönnum félagsins en Jón Daði hafði verið í frystikistunni hjá Millwall áður en hann skipti yfir til Bolton.
,,Það gerir það. Þetta er ábyggilega sú staða á vellinum sem þú þarft á hvað mestu sjálfstrausti að halda og fyrir hann að fá svona mikið pepp með sér frá stuðningsmönnum þegar að hann skiptir yfir til Bolton. Það hjálpar honum að aðlagast og Bolton er okkar Íslendingaklúbbur.“
,,Það eru íslenskir fánar út um allt og guttar að syngja lög um hann, það virðist einhvern veginn allt vera í blóma,“ bætti Benedikt Bóas þá við.
Albert tók undir þessi orð Benedikts. ,,Það mætti halda að hann hefði átt langan feril þarna hjá félaginu áður og væri að snúa til baka.“
Hörður Snævar Jónsson, íþróttastjóri Torgs, var einnig einn af sérfræðingum þáttarins.
,,Ef vegabréfið þitt er blátt, þá ertu í guðatölu þarna í Bolton.“
Nánari umfjöllun um stöðu Jóns Dags Böðvarssonar hjá Bolton má sjá hér fyrir neðan.