Þremur leikjum er nýlokið í ensku úrvalsdeildinni.

Arsenal tók á móti Brighton og tapaði öðrum leik sínum í röð. Gestirnir komust yfir á 29. mínútu með góðu skoti frá Leandro Trossard. Enock Mwepu tvöfaldaði forskot Brighton með laglegu marki um miðjan seinni hálfleik.

Martin Ödegaard minnkaði muninn fyrir Arsenal seint í leiknum og fengu heimamenn tækifæri til að jafna í blálokin. Allt kom hins vegar fyrir ekki.

Arsenal er í fimmta sæti deildarinnar með 54 stig, jafnmörg og Tottenham sem er með betri markatölu.

Þá vann Chelsea 0-6  stórsigur á Southampton. Marcos Alonso og Mason Mount komu Chelsea í 0-2 á fyrsta stundarfjórðungi leiksins. Timo Werner bætti við þriðja markinu eftir rúmar 20 mínútur. Tíu mínútum síðar bætti Kai Havertz svo við fjórða markinu.

Fjörið hélt áfram í upphafi seinni hálfleiks og bætti Werner við fimmta marki Chelsea á 49. mínútu. Mount skoraði svo sjötta og síðasta mark leiksins á 54. mínútu.

Loks vann Leeds öruggan sigur á Watford á útivelli. Raphinha skoraði eina mark fyrri hálfleiksins. Rodrigo og Jack Harrison bættu svo við mörkum í þeim seinni.

Leeds er komið með 33 stig í sextánda sæti deildarinnar. Watford er með 22 stig í nítjánda sæti.