Arsene Wenger, fyrrum knattspyrnustjóri segir að ef svo fari að Mohamed Salah skrifi undir nýjan samning við Liverpool muni það vissulega leysa það vandamál að leikmaðurinn fari ekki til annars liðs. Hins vegar muni nýtt vandamál þá gera vart um sig.
Wenger var spurður út í samningsstöðu Salah í myndveri hjá beinSports á dögunum. Talið er að með nýjum samningi verði Salah launahæsti leikmaður Liverpool og muni fá í kringum 400 þúsund pund á viku. Sem besti leikmaður liðsins vill Liverpool að sjálfsögðu ekki missa Salah frá sér en Wenger segir að fleiri vandamál munu gera vart um sig eftir að samningurinn hefur verið undirritaður.
,,Þetta leysir eitt vandamál og býr til annað um leið. Félagið verður að spenna bogann eins mikið og það getur til þess að halda leikmanninum en á sama tíma eru hinir leikmennirnir sem eru nálægt honum í gæðum sem vilja það sama. Hins vegar er ekki til nægilega mikill peningur til þess að fullnægja kröfum þeirra allra vegna þess að miklu hefur verið tjaldað til fyrir Salah,“ sagði Arsene Wenger á beinSports.
Wenger segir Salah hins vegar verðskulda þennan samning. ,,Hann hefur átt framúrskarandi tímabil og síðan að hann gekk til liðs við Liverpool hefur hann bara orðið betri og betri með hverju árinu.“
Salah gekk til liðs við Liverpool frá ítalska félaginu Roma í júlí árið 2017. Síðan þá hefur hann spilað 241 leik fyrir félagið, skorað 153 mörk og gefið 57 stoðsendingar.