Þorsteinn Halldórsson, landsliðsþjálfari Íslands segir það mikilvægt að íslenska landsliðið sé komið í bílstjórasætið í sínum riðli eftir 5-0 sigur gegn Hvíta-Rússlandi í dag í undankeppni HM.
,,Heilt yfir var ég ánægður með leikinn. Mér fannst við leysa þetta vel og það var gott að ná að klára þetta í fyrri hálfleik. Um leið og við fundum svæði og sendingarmögleika fór þetta að funkera vel fyrir okkur,“ sagði Þorsteinn á blaðamannafundi eftir leikinn í dag.
Með sigrinum komst íslenska liðið upp í 1. sæti síns riðils og er með eins stigs forystu á Holland sem vermir 2. sæti.
,,Það er mikilvægt eins og staðan er í dag og hjálpar okkur í framhaldinu (að vera í bílstjórasætinu). Þetta snýst um að tapa sem fæstum stigum. Við ráðum þessu algjörlega sjálf. Þetta snýst um okkur og á þriðjudaginn er mikilvægur leikur upp á að halda þessari stöðu áfram.“
Íslenska liðið mætir Tékklandi á útivelli á þriðjudaginn en sökum þess hvernig leikur dagsins spilaðist náði Þorsteinn að hvíla lykilleikmenn liðsins.
,,Ég var búinn að teikna upp ákveðna hluti miðað við að þetta myndi ganga eftir eins og það gerði. Ég er ánægður með það hvernig við kláruðum þennan leik og hversu sannfærandi sigurinn var því ég hef áður gert ráð fyrir ákveðnum hlutum sem hafa ekki gengið eftir.“
Tveir leikmenn íslenska landsliðsins, þær Glódís Perla Viggósdóttir og Dagný Brynjarsdóttir, spiluðu í dag sinn 100. A-landsleik fyrir Íslands hönd. Þorsteinn segir það ánægjulegt að sjá leikmenn í kvennaboltanum ná slíkum leikjafjölda.
,,Þetta er risaáfangi og þessar stelpur geta spilað í mörg ár í viðbót. Þetta er afrek og frábært að sjá. Frábært að stelpur í kvennaboltanum nái þessum fjölda leikja.“
Þá voru fleiri jákvæðir punktar í tengslum við íslenska landsliðið í dag en Sara Björk Gunnarsdóttir klæddist landsliðstreyjunni á ný eftir barnsburð.
,,Sara kom fínt út úr þessu. Það kom smá rót á okkur eftir allar þessar skiptingar en flott að hún komi inn og nái að tengja aftur við hópinn og koma sér betur inn í hlutina,“ sagði Þorsteinn Halldórsson, landsliðsþjálfari íslenska kvennalandsliðsins á blaðamannafundi eftir 5-0 sigur Íslands á Hvíta-Rússlandi í dag.
