Þýska knattspyrnugoðsögnin Oliver Kahn, sem á sínum tíma sló í gegn í marki Bayern Munchen og þýska landsliðsins, telur að Sir Alex Ferguson, fyrrum knattpyrnustjóri Manchester United, sé enn reiður við sig fyrir að hafa ekki gengið til liðs við Manchester United á sínum tíma.

Árið er 2003 og Manchester United hafði árin áður ekki tekist að finna verðugan arftaka fyrir Peter Schmeichel sem yfirgaf liðið árið 1999 eftir að liðið hafði unnið þrennuna eins og frægt er orðið. Kahn var efstur á lista forráðamanna Manchester United á þessum tíma en hann hafði ekki áhuga á að fara frá Bayern.

,,Sir Alex Ferguson er ennþá reiður við mig fyrir það. Hann taldi að ég myndi ganga til liðs við Manchester United árið 2003 eða 2004 en ég vildi frekar skapa mér enn stærra nafn hjá Bayern,“ sagði Oliver Kahn í samtali við þýska miðilinn Bild.

Kahn segist sjá eftir þessari ákvörðun sinni í dag. ,,Þegar að ég horfi til baka, þá hefði ég átt að stökkva á þetta. Þetta hefði verið góð áskorun fyrir mig.“